Class XI, Islamiat, "اطاعتِ رسول صلی اللہ علیہ وسلم"

اطاعتِ رسول صلی اللہ علیہ وسلم

ابتدائیہ

رسولِ خدا اور اس کے بندوں کے درمیان ایک واسطہ ہے جس کے ذریعے خدا اپنے احکام بندوں تک پہنچاتا ہے اس حقیقت کے پیشِ نظر دین و دنیا میں انسان کی کامیابی صرف ایسے اعمال میں مضمر ہے جن سے خدا کی خوشنودی حاصل ہو۔ اللہ نے رسول کو انسانوں کی ہدایت کے لئے ذریعہ قرار دیا ہے۔ رسول انسانوں کو خدا کی رضا حاصل کرنے کے طریقے بتاتا ہے اور ان باتوں سے روکتا ہے جن سے خدا ناخوش ہوتا ہے۔

رسول دین اور شریعت کے طور پر جو کچھ لوگوں کے سامنے پیش کرتا ہے وہ اللہ کی طرف سے ہوتا ہے اس میں رسول کی مرضی شامل نہیں ہوتی۔ آنحضرت صلی اللہ علیہ وسلم نے یہ دیکھ کر کہ پچھلی امتوں نے اپنے انبیاءکی تعظیم و کریم کرتے کرتے انہیں خدائی کے مرتبے تک پہنچا دیا۔ اس بات کا بڑا خیال رکھا کہ کوئی شخص آپ صلی اللہ علیہ وسلم کی ایسی بے جا تعظیم نہ کریں جس سے فتنہ پیدا ہو۔ کئی بار لوگوں نے آپ صلی اللہ علیہ وسلم سے سجدہ کرنے کی اجازت چاہی لیکن آپ صلی اللہ علیہ وسلم نے سختی سے روک دیا اور بار بار خدا کے سامنے اپنی بندگی اور بے چارگی کا اعلان کیا۔ بعض لوگوں نے کہنا شروع کردیا کہ نبی کا کام اس کے سوا کچھ نہیں کہ وہ اللہ کی کتاب انسانوں تک پہنچا دے اور بس لیکن رسولوں کا کام اتنا ہی ہوتا تو خدا یہ کام دوسروں سے بھی لے سکتا تھا۔ آخر اس کے لئے یہ کیا مشکل تھا کہ لوگوں پر لکھی لکھائی کتابیں نازل کردیتا۔ یا فرشتوں کے ذریعے کتب بھیج دیتا۔
اس طرح حضرت نوح عہ نے فرمایا:

میں تم سے یہ نہیں کہتا کہ میرے قبضے میں خدا کے خزانے ہیں اور نہ میں غیب کا علم رکھتا ہوں۔ اور نہ میں یہ کہتا کہ میں فرشتہ ہوں۔

لیکن چونکہ شہادت حق کا کام بڑا وسیع ہے۔ لہذا اللہ تعالی نے انبیاءاور رسول بھیجے۔ ان انبیاءکی ذمہ داری اور ان کے مناسک کیا تھے۔ اس سلسلے مےں ہم قرآن مجید سے رہنمائی حاصل کریں گے۔ اس میں انبیاءکی کیا حیثیت بیان کی گئی ہے۔

قابلِ اطاعت

قرآن مجید کی رو سے نبی کی مکمل اطاعت اور پیروی ضروری ہوتی ہے اور دین و شریعت کے دائرے میں وہ جو کچھ کہتا ہے ایک مومن کا فرض ہے کہ اس کی تعمیل میں حیل و حجت نہ کرے اور مصلحت اور خواہ اس کی سمجھ میں آئے نہ آئے۔ ہر صورت میں یقین رکھے کہ خیر ہے اور سراپا حق ہے۔ ارشادِ باری تعالی ہے کہ:

ہم نے جس رسول کو بھی بھیجا اس لئے بھیجا کہ ازن خداوندی کے مطابق اس کی اطاعت کی جائے۔

پھر یہ اطاعت بھی صرف ظاہر کی حد تک نہیں ہونی چاہئے۔ نبی کریم صلی اللہ علیہ وسلم کے حقِ اطاعت کا تذکرہ کرتے ہوئے اللہ تعالی فرماتا ہے کہ:

پس اے نبی تمہارا رب گواہ کے کہ یہ لوگ مومن نہیں ہوسکتے جب تک آپس کے تمام معاملات میں تمہیں حکم نہ بتائیں اور پھر تمہارے فیصلہ پر بلا کسی تنگ دلی کے آمادگی کے ساتھ سر تسلیم خم نہ کردیں۔

اور یہ بات عقل کے مطابق بھی ہے۔ اسی لئے اگر انسان کے لئے اللہ تعالی کے احکام کو جاننے کا واحد ذریعہ نبی ہی ہے تو نبی کی کامل اطاعت اور پیروی کے بغیر اللہ کی اطاعت و بندگی کی کوئی شکل نہیں رہ جاتی یہی وجہ ہے کہ ہر نبی نے اپنی دعوت کے ساتھ یہ مطالبہ کیا:

اللہ سے ڈرو اور میری اطاعت کرو۔

اور یہ بھی فرمایا گیا کہ:

جس نے رسول کی اطاعت کی اس نے اللہ کی اطاعت کی۔

شارعِ کتاب اللہ

اللہ تعالی کی شریعت چونکہ ہمیشہ رہنے کے لئے ہے لہذا کتاب اللہ میں طریقہ اور اصول دیا گیا ہے اور اللہ تعالی کی شریعت چونکہ ہمیشہ رہنے کے لئے ہے چنانچہ کتاب اللہ میں دیا گیا طریقہ اور اصول اور اللہ کے پیغمبر کے ذمے یہ کام دیا گیا ہے کہ وہ ان کی تشریح کریں۔ سورة انحل میں ارشاد ہوتا ہے کہ:

اور ہم نے یہ ذکر (قرآن) تمہاری طرف اس لئے نازل کیا ہے تاکہ تم لوگوں کے لئے اس ہدایت کو واضح کردو جو ان کی طرف اتاری گئی ہے۔

یہ بات ظاہر ہے کہ تشریح خود کتاب کے الفاظ پڑھ کر سنا دینے سے نہیں ہوتی بلکہ تشریح کرنے والا اس کے الفاظ سے زائد بھی کچھ کہتا ہے تاکہ سننے والا بھی کتاب کا مقصد پوری طرح سمجھ سکے۔

معلم و تربی

آنحضرت صلی اللہ علیہ وسلم کا ذکر کرتے ہوئے قرآن میں ارشاد ہوا ہے کہ:

بلاشبہ اللہ تعالی نے مسلمانوں پر احسان فرمایا ہے کہ خود انہیں میں سے ایک رسول خود مبعوث کیا ہے جو اسکی ہدایت پڑھ کر سناتا ہے، ان کا تزکیہ کرتا ہے اور انہیں کتاب و حکمت کی تعلیم دیتا ہے۔

اللہ تعالی نے اپنے رسول کو صرف قرآن کی آیات سنانے کے لئے نہیں بھیجا تھا بلکہ اس کے ساتھ بعثت کے تین مقاصد تھے۔
(۱) آپ صلی اللہ علیہ وسلم لوگوں کو کتاب کی تعلیم دیں۔
(۲) اس کتاب کے منشا کے کتاب کام کرنے کی حکمت سلجھائیں۔
(۳) افراد کا انفرادی طور پر اور ان کی اجتماعی حقیقت کا بھی تزکیہ کریں۔ یعنی اپنی ترکیب سے ان کے اجتماعی اور انفرادی خرابیوں کو دور کریں اور ان کے اندر اچھے اور صاف اور بہتر اجتماعی نظام کی نشونما دیں۔

پیشوا، نمونہ تقلید

اللہ نے پیغمبروں کو ہادی رہنما اما و پیشوا بنایا ہے۔ یعنی نبوت اور وحی سے سرفراز ہونے کے بعد ان کی ذات مجسمہ میں ہدایت اور رہنمائی امامت اور پیشوائی کے لئے خاص ہوجاتی ہے وہ سب امت میں مبعوث ہوجاتے ہیں۔ اس کے سامنے ہدایت و رہنمائی کے دو چراغ ایک کتاب اللہ اور دوسری سنت رسول ان کی روشنی مل کر ایک ہوتی ہے۔ سورة ال عمران میں بھی فرمایا گیا ہے کہ:

اے نبی صلی اللہ علیہ وسلم! کہہ اگر تم اللہ سے محبت کرتے ہو تو میری پیروی کرو اللہ تم سے محبت کرے گا اور تمہارے گناہوں کو بخش دے گااور اللہ غفورالرحیم ہے۔ کہو اطاعت کرو اور رسول صلی اللہ علیہ وسلم کی پھر اگر وہ منہ موڑتے ہیں تو اللہ تعالی کافروں کو پسند نہیں کرتا۔

اسی طرح سورة الاحزاب میں فرمایا:

تمہارے لئے اللہ کے رسول میں بہترین نمونہ تقلید موجود ہے ہر اس شخص کے لئے جو اللہ اور یومِ آخرت کی امید رکھتا ہے۔ حضوراکرم صلی اللہ علیہ وسلم نے اپنے خطبہ میں سے ایک حجتہ الوداع کے موقع پر فرمایا:

میں تمہارے پاس دو چیزیں چھوڑے جارہا ہوں ایک اللہ کی کتاب اور اپنی سنت۔

شارع قانون ساز

قرآن مجید میں حضور اکرم صلی اللہ علیہ وسلم کا ذکر کرتے ہوئے اللہ تعالی فرماتا ہے:

وہ ان کو معروف کا حکم دیتا ہے اور منکر سے روکتا ہے اور ان کے لئے پاک چیزوں کو حلال کرتا ہے اور ان پر ناپاک چیزیں حرام کرتا ہے اور ان پر سے وہ بوجھ اور بندھن اتار دیتا ہے جو ان پر چڑھے ہوئے ہیں۔

اس آیت میں معلوم ہوتا ہے کہ اللہ تعالی نے نبی کریم صلی اللہ علیہ وسلم کو شریعی اختیارات عطا کئے ہیں۔ اللہ کی طرف سے امر اور نہی اور حلال اور حرام صرف وہی ہیں جو قرآن مجید میں بیان ہوتے ہےں۔ بلکہ جو کچھ حضوراکرم صلی اللہ علیہ وسلم نے حلال اور حرام قرار دئیے ہےں اور جس چیز کا حکم دیا ہے جس سے منع فرمایا ہے وہ بھی اللہ تعالی کے دیئے ہوئے اختیارات ہےں۔ اس لئے وہ بھی قانونِ خداوندی فکا حصہ ہے۔ یہی بات سورةالحشر میں پوری صداقت کے ساتھ بیان ہوئی ہے:

جوکچھ رسول تمہیں دے اسے لے لو اور جس چےز سے منع کرے اس سے رک جاو اور اللہ سے ڈرو اور بلاشبہ اللہ سخت سزا دینے والا ہے۔

قاضی اور حکیم

قرآن مجید میں بے شمار جگہوں پر اس کی وضاحت کی گئی ہے کہ اللہ نے نبی کریم صلی اللہ علیہ وسلم کو قاضی اور حکیم فرمایا ہے:

اے نبی صلی اللہ علیہ وسلم! ہم نے تمہاری طرف حق کے ساتھ کتاب نازل کی ہے تاکہ لوگوں کے درمیان فیصلے کرو جیسا کہ اللہ تمہیں دکھائے۔

مومن کی صفات میں سے ایک صفت یہ ہے کہ جب رسول کے فیصلے کی طرف دعوت دی جاتی ہے تو وہ کہتے ہیں کہ ہم نے سنا اور مان لیا اور اسی طرح ایک اور جگہ ارشاد ہوا ہے کہ:

مومنین کی شان یہ ہے کہ جب اللہ کا رسول تمہیں کسی معاملے میں کوئی حکم دے تو اسے بشرو چشم تسلیم کرلیتے ہیں اور ان کے دل مےں فیصلے کے خلاف ذرا بھی تنگی نہیں ہوتی۔

Class XI, Islamiat, "جہاد"

جہاد

جہاد کے لفظی معنی

عربی زبان میں جہد کے معنی کوشس اور مشق کے ہیں۔ اسی لفظ سے جہاد نکلا ہے۔

جہاد کے شرعی معنی

مذہبی اصطلاح میں جہاد دین کی سربلندی ، ملت کا دفاع اور نیکی کی اشاعت کے لئے کوشش اور اسلام کی راہ میں روکنے والوں کے خلاف مسلح جنگ کا نام ہے۔ جو شخص خدا کا کلمہ بلند کرنے کے لئے مال سے زبان سے یا قلم سے اور ہاتھ پاوں سے کوشش کرتا ہے۔ وہ بھی جہاد ہی ہے۔ مگر خاص طور پر جہاد کا لفظ اس جنگ کے لئے استعمال کیا گیا ہے جو تمام دنیاوی اعراض سے پاک ہوکرمحض خدا کی رضا کے لئے اسلام کے دشمنوں سے کیا جائے۔

جہاد کی اقسام

(۱) جہاد بالنفس
انسان کو اطاعت الہی سے روکنے والی پہلی چےز انسان کی اپنی خواہشات ہیں۔ جوہر وقت اس کے دل مےں موجزن رہتی ہیں۔ انسان کو ان کی سوکوبی کے لئے ہروقت چوکنا رہنا چاہئے۔ لہذا خواہشاتِ نفس کے خلاف جہاد کو نبی نے جہادِ اکبر کا نام دیا ہے۔ اور یہ جہاد کا وہ مرحلہ ہے جسے طے کرکئے بغیر انسان جہاد کے کسی اور میدان میں کامیابی حاصل نہیں کرسکتا۔

(۲) شیطان کے خلاف جہاد
اپنے نفس پر قابو پانے کے بعد ان شیطانوں سے نمٹنا ضروری ہے جو اللہ کے بندوں کو مختلف حیلوں اور بہانوں سے بہلا کر اپنی اطاعت اور بندگی پر مجبور کرتے ہیں۔ قرآن حکیم اس قسم کی ہر قوت کو طاغوت کا نام دیتا ہے۔ ارشادِ باری تعالی ہے کہ:

جو لوگ ایمان والے ہیں اللہ کی راہ میں اور جو کافر ہیں سو لڑتے ہیں۔ شیطان کی راہ میں۔

(۳) جہاد بالمال
جہاد بالمال سے کیا مراد ہے کہ جوشخص استطاعت رکھتا ہو اور اس کی مالی حالت بہتر ہو تو وہ مال کے ذریعے تبلیغِ دین اور دشمنوں کے خلاف ملک و ملت کی حفاظت کے لئے مال صرف کرکے جہاد میں حصہ دار بن سکتا ہی اور اجر حاص کرسکتا ہے۔

اے ایمان والوں کہو تو میں تمہیں ایسی تجارت بتادوں جو تم کو درد ناک عذاب سے نجات دلاسکے۔ اللہ اور اس کے رسول پر ایمان لاو اور اپنی جان و مال سے اللہ کی راہ مےں جہاد کرو یہ تمہارے لئے بہتر ہے۔ اگر تم جانتے ہو۔

(۴) جہاد بالعلم
اس سے مراد وہ جہاد اور ہردرجہ کوشش ہے جو باطل عقیدوں اور غیر الہی قانون اور ظلم و جبر کے مقابلے پر کلمہ حق کہہ کر کیا جائے اور عملی دلیلوں کے ذریعے انسانوں کی فلاح و بہبود کے لئے بلاخوف و خطر کی جائے۔ حضور اکرم صلی اللہ علیہ وسلم نے فرمایا:

سب سے بڑا جہاد حق بات ظلم اور سرکش حکمران کے سامنے کلمہ حق کہنا ہے۔

(۵) جہاد بالسیف
اس سے مراد وہ مسلح جدوجہد ہے جو مسلمانوں کے ملک کے خلاف دشمنِ اسلام کے حملے کے وقت ان کی حفاظت جان و مال اور تحفظِ ناموس کے لئے ہتھیاروں سے کی جائے۔ جب مسلمانوں کا حکم اسلام کے دشمنوں کے خلاف مقابلے کے لئے بلانے یا اعلان کرلے تو مسلمانوں پر فرض ہوجاتا ہے کہ وہ اس میں شریک ہو اور دشمن کا مقابلہ مسلح ہوکر کریں۔ اسکی اتنی اہم فرضیت ہی کہ حضور اکرم صلی اللہ علیہ وسلم نے فرمایا:

اگر ممکن ہوتا تو مےں دشمنوں کے مقابلے پر جنگ کرتے ہوئے شہید ہوتا اور پھر چلتا کہ دوبارہ زندہ کیا جاوں اور راہِ خدا میں دوبارہ شہید کیا جاوں۔

اس جہاد میں شریک ہوکر راہِ خدا میں جان دینے والوں کے لئے قرآن میں ارشاد ہے:

ان لوگوں کو جو راہِ خدا میں قتل کئے جائیں مردہ نہ کہو بلکہ وہ زندہ ہیں لیکن تمہیں اس کا شعور نہیں۔

جہاد کی فضیلت

اسلام مےں جہاد کو بڑی فضیلت حاصل ہے۔ قرآن و حدیث میں اس کی فضیلت کا بہت ذکر ملتا ہے مثلاً:

دائمی اور ابدی زندگی
اللہ کی راہ میں جان دینے والوں کو دائمی اور ابدی زندگی حاصل ہوتی ہے۔ اور اسے مردہ کہنے کی اجازت نہیں ہے۔ ارشادِ باری تعالی ہے:

اور اللہ کی راہ میں جو شہید ہوں ان کو مردہ نہ کہو بلکہ وہ زندہ ہےں لیکن تمہیں اس بات کا شعورنہیں۔

ایک اور جگہ فرمایا:

اور جو لوگ اللہ کی راہ میں قتل ہوتے ہیں ان کو مردہ نہ کہو وہ تو زندہ ہیں۔ اپنے رب کے ہاں رزق دیئے جاتے ہیں۔

جہاد کرنے والے ایمان میں صادق ہیں
اللہ کی راہ میں اپنے جان و مال سے جہاد کرنے والوں کے بارے میں ارشاد باری تعالی ہے:

مومن تووہ ہیں جو اللہ اور اسکے رسول پر ایمان لائے اور اللہ کی راہ میں جاہد کیا اپنے اموال اور اپنی جانوں سے یہی وہ لوگ ہیں جو سچے ہیں۔

جنت کا وعدہ
اللہ کی راہ میں جہاد کرنے والے سے اللہ نے جنت کا وعدہ کیا ہے۔ ارشادِ باری تعالی ہے کہ:

بے شک اللہ مومنوں سے ان کی جانیں اور مال کے عوض خرید لئے ہیں وہ اللہ کی راہ میں لڑتے ہیں وہ دشمن کو قتل کرتے ہیں اور خود قتل ہوجاتے ہیں یہ اللہ کے ذمے تورات، انجیل اور قرآن میں برحق وعدہ ہے اور اللہ سے بڑھ کر اپنے اس عہد کو پورا کرنے والا اور کون ہوسکتا ہے۔ پس تم اپنے اس سودے پر خوش ہوجاو تم نے جو اللہ سے کیا ہے۔ یہی عظیم کامیابی ہے۔

اللہ کے ہاں عظیم ترین درجہ
جہاد فی سبیل اللہ کرنے والوں کا اللہ کے ہاں عظیم ترین درجہ ہے۔ ارشادِ باری تعالی ہے:

اللہ کے ہاں تو انہیں لوگوں کا درجہ بڑا ہے جو ایمان لائے اور جنہوں نے اس کی راہ میں گھر بار چھوڑے اور جان و مال سے جہاد کیا۔ وہی لوگ کامیاب ہیں۔

اللہ ان سے محبت کرتا ہے
جو لوگ اللہ کی راہ میں جہاد کرتے ہیں۔ اللہ ان سے محبت کرتا ہے۔ قرآن مےںارشاد ہے کہ:

اللہ کو وہ لوگ پسند ہیں جو اس کی راہ میں اس طرح صف بینہ ہو کر لڑتے ہیں تویا کہ وہ ایک سیسہ پلائی ہوئی دیوار ہیں۔

ضرورت و اہمیت

قیامِ امن کے لئے جہاد ضروری ہے

دنیا میں امن کے قیام کے لئے جہاد ضروری ہے۔ اللہ تعالی کا ارشاد ہے کہ:

اور اگر اللہ کا بعض (لوگوں) کو بعض کے ذریعے ہٹادینا ہو تو زمین مےں بگاڑ ہوجاتا لیکن اللہ جہانوں پر فعل کرنے والا ہے۔

جہاد فرض کفایہ ہے

اگر ضرورت پڑے تو ملت کے لئے جہاد کرنا فرض کفایہ ہے۔ یعنی اگر ان میں سے ضرورت کے مطابق کچھ لوگ جہاد نہ کریں گے تو سب گہنگاروں میں شامل ہوجائےں گے۔ قرآن میں ارشاد ہے:

تم پر جہاد فرض کیا گیا ہے اگر چہ وہ تمہیں ناپسند ہے اور ممکن ہے کہ تم ایک چےز کو ناپسند کرو اور تمہارے لئے بہتر ہو۔

اسی طرح ایک اور جگہ ارشاد ہوتا ہے:

اور اس کی راہ میں جہاد کرو جیسے جہاد کرنے کا حق ہے۔

دشمن اہلِ اسلام کو ظلم کا نشانہ بنائے
مظلوم مسلمان کی مدد کے لئے جہاد کی نہ صرف اجازت ہے بلکہ اس کی ترغیب دی گئی ہے۔ ارشادِ باری تعالی ہے کہ:

اور تمہیں کیا ہوگیا ہے کہ تم اللہ کی راہ میں ان بے بس مردوں، عورتوں اور بچوں کی خاطر نہےں لڑتے جو کمزور کرکے دیا کئے گئے ہیں اور فریاد کررہے ہیں کہ خدایا ہم کو اس بستی سے نکال دے جس کے باشندے ظالم ہیں اور اپنی طرف سے ہمارا کوئی حامی و مددگار پیدا کردے۔

دشمن فتنہ و فساد پھیلائے
اگر دشمن فتنہ و فساد پھیلائے تو فتنے کو دور کرنے کے لئے جنگ کا حکم ہے۔

تم ان سے لڑتے رہو تاکہ فتنہ باقی نہ رہے اور دین اللہ کا ہوجائے۔

Class XI, Islamiat, "زکوة"

زکوة

زکوة کے لغوی معنی

زکوة کے لغوی معنی نشونما پانے کے ہیں ایک اور مطلب اس کا پاک کرنا بھی ہے۔

زکوة کے شرعی معنی

شریعت کی اصطلاح میں زکوة ایک مالی عبادت ہے۔ یہ مال کہ اس حصے کو کہتے ہیں جو ہر سال ادا کیا جاتا ہے۔ اللہ نے ایک خاص مقدار موجودہ مال پر ہر سال ادا کرنے کا حکم دیا ہے۔ ارشادِ باری تعالی ہے کہ:

اے نبی! ان کی دولت سے آپ زکوة لیجئے جس کے ذریعہ سے آپ صلی اللہ علیہ وسلم ان کو پاک و صاف کردیں گے۔

زکوة کے معنی قرآن کی روشنی میں

قرآن مجید میں ارشاد ہوتا ہے کہ:

جو لوگ زکوة ادا کرتے ہیں اللہ تعالی ان کے مال مےں برکت ڈال دیتا ہے۔

ایک اور جگہ ارشاد باری تعالی ہے:

اور یہ وہ لوگ ہیں جن کے مال میں غریبوں اور ناداروں کو معلوم اور مقرر حق ہے۔

اللہ تعالی فرماتا ہے کہ:

جو لوگ مال جمع کرتے ہیں اور اللہ کے لئے خرچ نہیں کرتے وہ اس خوش فہمی میں ہیں کہ یہ بخل اور زرپرستی ان کے حق میں ہے۔

زکوة کا مطلب احادیث مبارکہ کی روشنی میں

حضور اکرم صلی اللہ علیہ وسلم نے فرمایا:

جو اللہ تعالی اور اس کے رسول پر ایمان لائے اسے چاہئے کہ وہ زکوة ادا کرے۔

ایک اور جگہ آپ صلی اللہ علیہ وسلم نے فرمایا:

جو لوگ زکوة ادا نہیں کرتے ان کا مال قیامت کے دن ایک سانپ کی شکل میں بدل دیا جائے جو اسے ڈھونڈے گا اور کہے گا کہ میں تیرا مال ہوں۔

ایک عورت حضوراکرم صلی اللہ علیہ وسلم کی خدمت مےں حاضر ہوئی اس کی بیٹی نے ہاتھوں میں سونے کے کڑے پہنے ہوئے تھے۔ آپ صلی اللہ علیہ وسلم نے فرمایا

کیا تم اس کی زکوة دیتی ہو؟ عورت نے کہا نہیں

آپ نے فرمایا کہ

کیا تم چاہتی ہو کہ قیامت کے دن یہ کڑے آگ کے ہوں۔

زکوة کی فرضیت

زکوة اسلام کا تیسرا رکن ہے ہر بالغ صاحبِ نصاب پر اس کی فرضیت بالکل لازم ہے اور اس کا انکار کرنے والا کافر اور ترک کرنے والا فاسق ہے۔ اس کی فضیلت اس لئے بھی بہت زیادہ ہے کہ قرآن میں کئی جگہ اس کا ذکر نماز کے ساتھ کیا گیا ہے اور الگ بھی اس کا ذکر ہے۔ زکوة ادا کرنے والوں کو بڑے دلکش اور سچے وعدوں سے نوازا گیا ہے اور ادا نہ کرنے والوں کو شدید عذاب کی خبر دی گئی ہے۔ قرآن مجید میں اس کی فرضیت کو ان الفاظ میں بیان کیا گیا ہے کہ:

اور نماز قائم کرو اور زکوة ادا کرو۔

ایک اور جگہ ارشاد ہوتا ہے:

اور نماز پڑھا کرو، زکوة دیا کرو اور جو نیکی تم اپنے لئے پہلے (مرنے سے پہلے) کرلوگے اس کے ثواب کو تم اللہ کی یہاں پاوگے۔

قرآن پاک میں ارشاد ہوتا ہے:

اگر تم اللہ کو قرضِ حسنہ دوگے تو وہ اس ثواب کو تمہارے لئے بڑھاتا چلا جائے گا۔

گزشتہ انبیاءپر زکوة

قرآن کی شہادت سے ظاہر ہوتا ہے کہ زکوة گزشتہ انبیاءپر بھی اور مذاہب میں بھی فرض کی گئی تھی مگر ان انبیاءکی امتوں نے اس فرض کو فراموش کردیا۔ بنی اسرائیل میں زکوة پیدوار پر مشتمل تھی۔ اللہ تعالی نے فرمایا:

اور ہم نے بنی اسرائیل سے عہد کرالیا تھا کہ پڑھتے رہو نماز اور زکوة دیتے رہو۔

حضرت عیسیٰ عہ کی امت پر بھی زکوة فرض تھی۔ اللہ تعالی کافرمان حضرت عیسیٰ عہ کی زبان میں درج ذیل ہے:

اللہ نے مجھے ساری زندگی زکوة کی تلقین کرنے کو کہا ہے۔

حضرت اسماعیل عہ کی امت پر بھی زکوة فرض تھی۔ ارشاد ہوتا ہے کہ:

اور وہ لوگوں کو نماز پڑھنے اور زکوة دینے کی ہدایت کرتے تھے۔

غرضیکہ حضور صلی اللہ علیہ وسلم پاک سے پہلے تمام مذاہب میں زکوة موجود تھی۔ قرآن میں سورة الانبیاءمیں حضرت نوح عہ، حضرت لوط عہ، حضرت ہارون عہ، حضرت اسحاق اور حضرت یعقوب عہ کا ذکر کرنے کے بعد فرمایا گیا ہے کہ:

اور ہم نے انہیں نیک کام کرنے، نماز کا اہتمام کرنے اور زکوة دیتے رہنے کی ہدایت کی۔

زکوة کی تاریخ

نماز کی طرح زکوة کی طرح زکوة کا آغاز بھی اسلام کے ابتدائی دور ہی میں ہوگیا تھا۔ ابتدا میں زکوة کے لفظ کی جگہ خیرات کا لفظ استعمال ہوتا تھا۔ جس کا نصاب، حد اور استعمال مقرر نہ تھا۔ فتح مکہ کے بعد زکوة کا اصل نفاذ شروع ہوا۔ آپ صلی اللہ علیہ وسلم نے زکوة کو دو لفظوں کا مرکب بتایا ہے۔ ایک اللہ کا حق اور دوسرا مسلمان کا حق۔ پہلے حق سے مراد نماز اور دوسرے سے مراد زکوة ہے۔ آپ صلی اللہ علیہ وسلم غارِ حرا میں اللہ کی عبادت کے ساتھ غریبوں کی مدد بھی کرتے تھے۔ جیسا کہ حضرت خدیجہ فرماتی ہیں کہ:

آپ قرابت داروں کا حق ادا کرتے ہیں اورمصیبت میں لوگوں کی مدد کرتے ہیں۔

دربارِ نجاشی میں حضرت جعفر نے اسلام اور حضوراکرم صلی اللہ علیہ وسلم کے بارے میں تقریر کی تھی اسمیں زکوة کا ذکر بھی آیا تھا۔ اس سے ثابت ہوا کہ زکوة کا آغاز ابتدائی دور میں ہی ہوگیا تھا اور یہ ایسی عبادت قرار دی گئی کہ نماز کے ساتھ ہی فرض ہوئی اور قرآن میں اصلوة اور الذکوة کے الفاظ استعمال ہوئے ہیں۔ نماز اگرحقوق اللہ ہے تو زکوة بھی حقوق العباد میں ہے۔ یہ اصل میں ۸ ہجری میں فرض ہوئی اور اس کے بعد آپ صلی اللہ علیہ وسلم نے اس کی وصولی کے لئے عامل مقرر فرمائے۔

زکوة کی فضیلت و اہمیت

زکوة اس قدر اہم رکن ہے کہ قرآن و حدیث میں بار بار اس کا ذکر کیا گیا ہے۔ سورة توبہ میں ذکر ہے کہ:

اور جو لوگ سونا چاندی جمع کرکے اسے اللہ تعالی کی راہ میں خرچ نہیں کرتے ان کو آپﷺ ایک بڑی دردناک سزا کی خبر سنادیجئے جو ان کو واقع ہوگی جب ان کو دوزخ کی آگ میں تپایا جائے گا اور اس سے ان کی پیشانیوں کو اور ان کی کروٹوں اور پشت کو داغا جائے گا اور کہا جائے گا، اب اپنے جمع کرنے کا مزہ چکھو۔

زکوة ادا کرنے کی فضیلت و اہمیت سورة ابقرہ میں ان الفاظ میں بیا کی گئی ہے کہ:

جو لوگ زکوة ادا کریں گے انہیں اجرِ عظیم کی خوشخبری سنائی گئی ہے یعنی اللہ کی راہ میں دئیے گئے ایک روپے کا ثواب سات سو گناہ ملے گا۔

زکوة کی فضیلت و اہمیت چند الفاظ میں محدود نہیں کی جاسکتی بلکہ اللہ اس کا اجر دنیا میں بھی دیتا ہے اور آخرت میں بھی دیگا۔ یہ ایسی تجارت ہے جس میں نقصان کا سوال ہی پیدا نہیں ہوتا مگر شرط یہ ہے کہ نیت صاف ہو اور صرف اللہ تعالی کے لئے دی گئی ہو۔ فرمانِ الہی ہے کہ:

جو لوگ دن رات کھلے اور چھپے اللہ کی راہ میں خرچ کرتے ہیں تو ان کی مزدوری اللہ کے یہاں ہے۔ آخرت میں نہ ان پر خوف ہوگا اور نہ وہ غمگین ہونگے۔

ارشادِ باری تعالی ہے کہ:

میری رحمت ہر چیز پر شامل ہے بس عنقریب میں اس کو ان لوگوں کے لئے مقرر کردوں گا جو پرہیز گار ہیں اور زکوة دیتے ہیں۔

نہ صرف قرآن مجید میں بلکہ احادیث کی روشنی میں زکوة کی فضیلت و اہمیت واضح ہوجاتی ہے۔ آپ صلی اللہ علیہ وسلم نے فرمایا کہ:

جوشخص اللہ اور اس کے رسول پر ایمان رکھتا ہے اسے چاہئے کہ اپنے مال کی زکوة ادا کرے۔

ایک اور جگہ آپ صلی اللہ علیہ وسلم نے فرمایا کہ:

جوشخص زکوة ادا نہیں کرتا اس کی نماز قبول نہیں ہوتی۔

آنحضرت صلی اللہ علیہ وسلم نے فرمایا کہ:

جس نے زکوة دینا بند کردی اللہ اس پر بارش روک دیتا ہے۔

زکوة کی اہمیت کو واضح کرتے ہوئے حضوراکرم صلی اللہ علیہ وسلم فرماتے ہیں:

جوشخص حرام مال کھاتا ہے اور اگر وہ خرچ کرے تو اس میں برکت نہیں ہوتی، صدقہ کرے تو قبول نہیں ہوتا اور اگر میراث کے طور پر چھوڑ جائے تو گویا جہنم کا گوشہ چھوڑ گیا۔

قرآن و حدیث کے علاوہ صحابہ کرام نے بھی زکوة کی فرضیت و اہمیت اور فضیلت کے بارے میں بہت زور دیا ہے۔ حضرت ابنِ مسعود فرماتے ہیں کہ:

جوشخص حلال مال کمائے اور اس کی زکوة ادا نہ کرے تو اس ک مال خراب ہوجاتا ہے اور جوشخص حرام مال کمائے اور زکوة ادا کرے تب بھی اس کا مال پاک نہیں ہوتا۔

حضرت ابوبکر صدیق رضہ فرماتے ہیں:

خدا کی قسم جو نماز اور زکوة میں فرق کرےگا میں اس سے جنگ کروں گا اور جو رسول صلی اللہ علیہ وسلم کے زمانے میں ایک بھیڑ کا بچہ بھی زکوة میں دیتا تھا اسے دینا پڑے گا۔

یہ فرمان اس وقت کا ہے جب حضرت ابوبکر صدیق رضہ کے خلافت سنبھالنے کے بعد اہلِ عرب نے زکوة دینے سے انکار کیا تو انہوں نے ان لوگوں کے خلاف تلوار اٹھائی۔

مصارفِ زکوة

اللہ تعالی نے زکوة کے مصارف خود قرآن میں اس طرح بیان فرمادیئے ہیں کہ:
زکوة مفلسوں اور محتاجوں کا حق ہے، زکوة کے کام پر جانے والوں کا، گردن چھڑانے والوں کا اور جو تاوان بھرے اللہ کے راستے میں راہ کے مسافر کا۔

قرآن کی اس رو سے زکوة کے مندرجہ ذیل مصارف معلوم ہوئے:

• ان تنگدست لوگوں کی مدد جن کے پاس کچھ نہ ہو۔
• ان لوگوںکی مدد جو زندگی کی بنیادی ضرورتوں سے محروم ہوں۔
• زکوة کی وصولی پر متعین عملے کی تنخواہیں وغیرہ۔
• ان لوگوں کی مدد جو نومسلم ہیں تاکہ ان کو سکونِ قلب حاصل ہوسکے۔
• غلاموں اور قیدیوں کو آزاد کرنے کے لئے اخراجات میں۔
• بہت غریب قرضداروں کے قرض کی ادائیگی میں۔
• اللہ کے لئے جہاد اور تبلیغِ دین میں جانے والوں کی مدد میں۔
• کوئی مسافر چاہے کتنا ہی خوشحال ہو مگر راستے میں مالی محتاج ہو۔

جب اسلامی نظامِ حکومت قائم ہوجائے تو زکوة حکومت سپرد کرنا لازم ہوگا تاکہ وہ اپنے طور پر بہتر طریقے سے تقسیم کرے اگر کسی اسلامی ریاست پر غیر اسلامی حکومت کا تسلط ہوجائے تو اس صورت میں ہر فرض اپنے طور پر زکوة ادا کرسکتا ہے۔

مسائلِ زکوة

زکوة کے مسائل سے مراد یہ ہے کہ زکوة کون کون سے اشیاءپر فرض ہے۔ وہ مال خواہ کسی بھی شکل میں ہو اگر پورے ایک سال تک جمع ہو تو اس جمع شدہ مال یا نصاب پر مندرجہ ذیل طریقے سے زکوة دینا فرض ہے۔

سونا
ساڑھے سات تولے سونے پر ڈھائی فیصد کے حساب سے زکوة نکالی جائے گی۔

چاندی
ساڑھے باون تولے چاندی پر بھی ڈھائی فیصد کے حساب سے زکوة نکالی جائے گی۔

روپے
سوروپے پر ڈھائی روپے کے حساب سے زکوة نکالی جائے گی۔

سامانِ تجارت
اگر کوئی سامانِ تجارت سال بھر تک رکھا ہو اوراس کی قیمت سونے یا چاندی یا دونوں میں سے کسی ایک کے برابر ہو تو اس کے مطابق زکوة نکالی جائے گی۔

جائیداد
جائیداد پر بھی ڈھائی فیصد کے حساب سے زکوة فرض ہے۔

غلہ اور پیداواری زمین
۰۸ من غلے پر زکوة فرض ہے اس سے پر کم نہیں۔

بارانی زمین
ایسی زمین پر دسواں حصہ زکوة ہے۔ ندیوں سے سیراب ہونے والی زمین پر پانچواں اور ٹیوب سیل و کنووں سے سیراب ہونے والی زمین پر دتیسواں حصہ ہے۔ اگر زمین سے کوئی خزانہ نکلے تو اس پر ایک بٹا پانچ زکوة ہے۔

موشی اور جانور
مویشیوں پر بھی زکوة دینا فرض ہے۔ اگر ان کی قیمت مال تجارت کے برابر ہو اور جانور تجارت کے لئے استعمال ہورہے ہیں تو اس کا حساب اس طرح ہے۔

• پانچ یا زائد اونٹوں پر ایک سالہ بکری یا اس کے برابر قیمت۔
• تیس گائیں، بیل یا بھینس پر ایک گائے۔
• چالیس بکریوں پر ایک بکری۔

وة مندرجہ ذیل لوگوں پر فرض ہے

مسلم
زکوة صرف مسلمانوں پر فرض ہے۔ غیر مسلموں پر زکوة نہیں ہے۔

بالغ اور باشعور
جو شخص بالغ ہونے کے ساتھ باشعور بھی ہے اور زندگی کے تمام معاملات میں عقل و شعور سے کام لیتا ہو اس پر زکوة فرض ہے۔

مالکِ نصاب
جو شخص صاحب نصاب ہو اس پر زکوة فرض ہے۔

تکمیلِ سال
ہر نصاب کے مطابق کسی مال پر سال کے مکمل ہونے پر زکوة فرض ہوتی ہے۔

قرضدار
ہر قرضدار قرض ادا کرنے کے بعد اگر صاحبِ نصاب ہوجائے تو اس پر زکوة فرض ہوگی۔

ضرورت سے زائد
زندگی کی لازمی ضروریات پوری کرنے کے بعد جو مال بچے اس پر نصاب کے مطابق زکوة فرض ہے۔

زکوة سے مستثنی حضرات

صاحبِ حیثیت مسلمان
وہ مسلمان جو گھر پر ۰۵ روپے سے زائد کا سامان رکھتا ہو اور صاحبِ نصاب ہو۔

غیر مسلم
غیر مسلموں کو زکوة نہیں دی جاسکتی۔

سید اور اہلِ بیت
سید اور اہلِ بیت کو زکوة نہیں دی جاسکتی صرف ان کی مدد کی جاسکتی ہے۔

تعمیرِ مسجد اور کفن دفن
ان کاموں کے لئے بھی زکوة نہیں دی جاسکتی صرف چندہ یا مدد کی جاسکتی ہے۔

زکوة کے مقاصد و فوائد

زکوة ایک ایسا اسلامی رکن ہے جس کا ذکر قرآن میں نماز کے ساتھ آیا ہے اور یہ بات واضح ہوگئی کہ جوشخص زکوة نہیں دے گا اس کی نماز بھی قبول نہیں ہوگی جیسا کہ ارشادِ ربانی ہے کہ:

اور نماز پڑھا کرو اور زکوة دیا کرو اور خدا کے آگے جھکنے والوں کے ساتھ جھکا کرو۔

زکوة مالی عبادت ہے جو مال کو پاک و صاف کردیتی ہے اور اس میں برکت اور اضافہ بھی کرتی ہے۔ جب انسان حلال اور پاکیزہ مال استعمال کرتا ہے تو اس کی زندگی بھی پاک و صاف ہوجاتی ہے اور اس کی اولاد حلال مال استعمال کرکے سیدھے راستے پر آجاتی ہے۔ زکوة ایک قسم کا قرض ہے جو بندہ اپنے رب کو دیتا ہے جب انسان دولت جیسی چیز اللہ کے نام پر قربان کرتا ہے تو اللہ اس کے ایثار کی قدر کرتے ہوئے اس کے مال پر کئی گنا منافع بڑھا دیتا ہے۔ ارشاد ِ باری تعالی ہے:

اگر قرض دو اللہ کو تو اچھی طرح دو تاکہ وہ اس کو تمہارے لئے دوگنا کردے اور تم کو بخشے۔

زکوة کے دو اہم فوائد مندرجہ ذیل ہیں:

(۱) انفرادی فوائد
(۲) اجتمائی فوائد

انفرادی فوائد

جیسا کہ معلوم ہے کہ زکوة انسان کے مال کو پاک و صاف کرتی ہے تو جب انسان کے جسم میں پاک و صاف مال سے حاصل کی ہوئی غذا پہنچتی ہے تو اس کا دل و دماغ بھی پاکیزہ خیالت کا مرکز بن جاتا ہے اور اس میں اوصافِ حمیدہ پیدا ہوجاتے ہیں۔

محبتِ الہی
جب انسان مال پر زکوة دیتا ہے تو اس کی مال سے محبت کم ہوتی رہتی ہے اور اس کا دل اللہ کی محبت سے معمور ہوجاتا ہے۔ وہ سمجھتا ہے کہ جو مال میں کھالوں گا یا پہن لوں گا وہی میرا ہے باقی ہے سب اللہ کا ہے اور اس پر دوسروں کا بھی حق ہے۔ اس طرح اس کے دل سے مال اور دنیا کی محبت نکل جاتی ہے۔

غریبوں اور مساکین کی محبت
زکوة کا نظام معاشی ناہمواری ختم کرنے کے لئے قائم کیا گیا ہے۔ زکوة دینے والے کے دل میں غریبوں اور مساکین کی محبت پیدا ہوتی ہے۔

قلب کی صفائی و پاکیزگی
زکوة بڑے بڑے حاسدوں اور سرکشوں کے قلب کو پاک و صاف کردیتی ہے۔ کیونکہ ان کے دل میں اللہ کا خوف پیدا ہوجاتا ہے اور وہ زکوة اللہ کے حکم اور خوف سے ہی ادا کرتے ہیں۔ تو اس طرح ان کے دل سے لالچ، ہوس اور بخل نکل جاتا ہے اور وہ زیادہ سے زیادہ غریبوں کی ہمدرد بن جاتے ہیں اور ان کی مدد کرتے ہیں۔

گردشِ دولت
زکوة کے ذریعے دولت ایک مرکز میں جمع نہیں ہوتی بلکہ امیروں سے غریبوں کی طرف گردش کرتی رہتی ہے۔ مال انسان کا سب سے بڑا دشمن ہے اس کی محبت انسان کو دنیا داری کے جال میں اس طرح جکڑ لیتی ہے کہ اللہ کی محبت اس کے دل سے نکل جاتی ہے۔ آپ صلی اللہ علیہ وسلم نے اس بارے میں فرمایا ہے کہ:

ہر امت کا ایک فتنہ ہوتا ہے اور میری امت کا فتنہ مال ہے۔

انسان اگر یہ ارادہ کرلے کہ اس کو مال کے فتنے سے بچنا ہے تو وہ مال میں سے ان کا بھی حق نکالے جو اس کے مستحق ہیں اور اس کا ذریعہ زکوة ہے۔ زکوة ہی انسان کو گناہوں سے دور کردیتی ہے۔ اللہ ایسے لوگوں کے بارے میں ارشاد فرماتا ہے کہ:

اور وہ لوگ دوزخ سے دور رکھے جائیں گے جو اللہ سے ڈرتے ہیں اور مال خرچ کرتے ہیں۔

اجتماعی فوائد

زکوة سے حاصل ہونے والے سماجی یا اجتماعی فوائد کی تفصیل مندرجہ ذیل ہے:

امدادِ باہمی
زکوة نہ صرف انسان کی اپنی ذات پر اچھے اثرات مرتب کرتی ہے بلکہ پورے معاشرے ، ملک اور عالم اسلام پر اس کے اثرات مرتب ہوتے ہیں۔ زکوة کا مقصد ایک دوسرے کی مدد کرنا، غریبوں سے محبت کرنا اور ملک میں معشی مساوات پیدا کرنا ہے۔ امیروں کی دولت میں غریبوں کا بھی حق ہے اور زکوة کا نظام یہ حق غریبوں کو دلواتا ہے کہ وہ امیروں سے مالی سرمایہ حاصل کریں۔ زکوة کے ذریعے بے سہاروں کے روزگار کا بندوبست بھی کیا ہے۔ حضور اکرم صلی اللہ علیہ وسلم نے ارشاد فرمایا ہے کہ:

اللہ نے زکوة فرض کی ہے کہ امیروں سے لی جائے اور غریبوں میں تقسیم کی جائے۔

نصرت دین
اللہ تعالی نے بار بار مسلمانوں کی جان، ایمان اور عزت کی حفاظت کے لئے جہاد کا حکم دیا ہے جس میں مال کی بھی ضرورت ہوتی ہے۔ زکوة کا روپیہ اس کام میں خرچ کیا جاسکتا ہے۔ اس کے علاوہ تبلیغِ دین کے لئے بھی زکوة بڑی معاون ہے۔ زکوة دینا اور اس کا صحیح مصرف دونوں ثواب میں اضافہ کرتے ہیں اور جو لوگ ایسا نہیں کرتے ان کے لئے فرمایا گیا ہے کہ:

اللہ کے لئے خرچ کرو اور ہاتھ روک کر اپنے کو ہلاکت میں نہ ڈالو۔

اشتراکیت کا علاج
حضرت محمد مصطفی صلی اللہ علیہ وسلم نے حقِ ملکیت عطاکرکے انسان میں اعلی اخلاق پیدا کئے ہیں اور یہ حق انسانی فطرت کے مطابق ہے۔ وہ اس طرح کہ جب انسان اپنے ذاتی مال میں سے اپنے ہاتھ سے ناداروں اور محتاجوں کو روپیہ دیتا ہے اور ان کے دکھ کا مداوا کرتا ہے تو اس کے دل کو سکون اور خوشی حاصل ہوتی ہے۔ وہ سمجھتا ہے کہ میں اس قابل ہوں کہ کسی کی مدد کرسکوں۔ یہ حقوقِ ملکیت اشتراکی حکومتوں میں نہیں ہوتے وہاں سارے حقوق حکومت کے پاس ہوتے ہیں۔

سرمایہ داری کا خاتمہ
اسلام نے سرمایہ داری نظام کو ناپسند فرمایا کیونکہ اس نظام میں دولت چند ہاتھوں میں گردش کرتی رہتی ہے اور بہت سی سماجی برائیاں جنم لیتی ہیں۔ امیروغریب میں فاصلے بڑھ جاتے ہیں۔ اس لئے زکوة کے ذریعہ امیر اپنی دولت میں سے کچھ غریبوں کو دینے پر مجبور ہوجاتا ہے اور کسی حد تک معاشی ناہمواری دور ہوجاتی ہے۔ سرمایہ داری نظام بھی دم توڑنے لگتا ہے۔ غربت اور ناداری میں کمی ہوتی ہے۔

اچھے جذبات کا فروغ
جب دولتمندوں کو یہ معلوم ہوگا کہ ہمیں زکوة ادا کرنی ہے تو ان کے دل میں غریبوں کے لئے ہمدردی اور اخوت کے جذبات پیدا ہوجاتے ہیں۔ دونوں طبقے ایک دوسرے کے قریب آجاتے ہیں اور اعتماد کی فضا قائم ہوتی ہیں۔

قومی ترقی
زکوة سے غربائ، نادار بے روزگار اور بے سہارا اپنا کاروبار شروع کرسکتے ہیں اس سے قومی ترقی کو فروغ حاصل ہوتا ہے۔

حرفِ آخر

زکوة انسان کے مال کو پاک و صاف کرنے کے علاوہ اس میں برکت کا بھی باعث ہے۔ انسان اپنی آخرت سنوارتا ہے اور معاشی ناہمواری دور کرنے میں معاون ثابت ہوتا ہے۔